فيديريكو فالفيردي في مركز الظهير الأيمن

كالعادة يا جماعة أنشيلوتي بيحب يجرب حلول جديدة للفريق . لكن آخر فكرة له بصراحة غريبة شوي . قرر يحط فيديريكو فالفيردي كظهير أيمن . يعني لو فكرتوا فيها شوي بتحسوا إنه قرار مش بمكانه أبداً . لأن فالفيردي أساسي في خط الوسط ووجوده هناك بيعمل فرق كبير في أداء الفريق . لاعب عنده ديناميكية وكفاءة عالية بصراحة

إذا بتحسبوها من الناحية التكتيكية . فالفيردي مش بس لاعب سريع ومهاري . هو كمان بيعمل فارق كبير في الوسط من خلال تمريراته الحاسمة وقدرته على كسر خطوط الخصم . لما يكون في الوسط بنقدر نشوف كيف بيربط بين الدفاع والهجوم بسهولة وبيخلق فرص بشكل ممتاز . ولو نقلناه لخط الدفاع رح نخسر كتير من إمكانياته الهجومية اللي من الصعب يعوضها لاعب ثاني

صراحة بحس إن فالفيردي كلاعب موهوب . قادر يغير مجرى المباراة بلحظات . ولما يكون بدوره الطبيعي كوسط ميدان بيكون أكثر تأثيراً . لكن أنشيلوتي أحياناً بيحاول يخترع حلول بدون ما يعطي الفرصة للاعبين الشباب مثل فورتيه اللي بيقدر يثبت وجوده ويعطي حلول دفاعية كظهير . فيديريكو لازم يظل بمكانه في الوسط

وبعدين لو نحكي على الناحية الدفاعية . بنشوف إنه في لاعبين أكفاء في الأكاديمية أو حتى على الدكة . طيب ليش ما يجربهم أنشيلوتي كبدائل ؟ فالفيردي مو لازم يكون الحل لكل مركز شاغر . الفريق عنده مواهب والشباب لازم يكون لهم فرصة يعبروا عن أنفسهم . خصوصاً بمباريات مهمة مثل هاي

بصراحة بحس إنه أنشيلوتي عنده ثقة كبيرة بفالفيردي . وهذا شيء رائع أكيد . لكن التغييرات اللي بتأثر على مراكز اللاعبين بشكل جذري . ما بتكون دايماً الحل الأمثل . فالفيردي لازم يكون محوري في خط الوسط ليعطي كل ما عنده للفريق .